ABŞ-ın İran sahilləri yaxınlığında hərbi mövcudluğunu əhəmiyyətli dərəcədə artırması regionda gərginliyi yenidən gündəmə gətirib. Hərbi müxbir Aleksandr Kots İranın belə bir vəziyyətdə cavab imkanlarını şərh edib.
Onun sözlərinə görə, ABŞ Hərbi Dəniz Qüvvələri son 20 ildə ilk dəfə olaraq bölgədə eyni vaxtda üç aviadaşıyıcı zərbə qrupunu cəmləşdirib. Bunlar arasında USS Abraham Lincoln, USS Gerald R. Ford və USS George H. W. Bush yer alır. Bu qüvvələr ümumilikdə yüzlərlə döyüş təyyarəsi və helikopterin yerləşdirilməsinə imkan verir.
Məlumata görə, bu qruplaşmanı həmçinin “Arleigh Burke” sinifli esmineslər müşayiət edir və onlar yüzlərlə “Tomahawk” qanadlı raketi ilə təchiz olunub. Bundan əlavə, ABŞ bölgəyə desant gəmiləri də göndərib ki, bu da minlərlə dəniz piyadasının yerləşdirilməsinə şərait yaradır.
Ekspert qeyd edir ki, mövcud qüvvələr genişmiqyaslı quru əməliyyatı üçün kifayət etməsə də, Hörmüz boğazı ətrafında strateji nəzarət cəhdləri istisna edilmir.
Digər tərəfdən, Kotsun fikrincə, İranın əsas üstünlüyü onun “moskito donanması” adlandırılan kiçik və sürətli qayıqlarından ibarət gücləridir. SEPAH tərkibində olan bu qüvvələr sürətli hücum, “sürü” taktikası və gizli yerləşmə imkanları ilə seçilir.
Ekspert vurğulayıb ki, İranın sürətli katerləri və mini sualtı qayıqları dəniz minaları yerləşdirmək və qəfil hücumlar həyata keçirmək qabiliyyətinə malikdir. Bu isə ABŞ üçün xüsusilə Hörmüz boğazı kimi strateji ərazilərdə nəzarəti çətinləşdirə bilər.
Onun qənaətinə görə, belə şəraitdə mümkün qarşıdurma yüksək riskli və qeyri-müəyyən nəticələrə malik ola bilər.
Mənbə: mail.ru