Çinli texnologiya şirkəti DeepSeek yeni nəsil süni intellekt modeli V4-ü təqdim edib. Şirkətin açıqlamasına görə, model OpenAI və Google kimi qlobal texnologiya nəhəngləri ilə rəqabət aparmaq məqsədi daşıyır.
Hangzhou şəhərində yerləşən DeepSeek tərəfindən hazırlanmış V4 modeli əvvəlki versiyalarla müqayisədə daha güclü hesablama imkanlarına malikdir. Model istifadəçi müdaxiləsi olmadan müəyyən qərarlar qəbul edə bilir və mürəkkəb proqramlaşdırma tapşırıqlarını avtomatik şəkildə yerinə yetirmək qabiliyyəti ilə seçilir.
Şirkət bildirir ki, V4 daha böyük həcmdə məlumatı emal edə bilir və süni intellektin verilən əmrləri anlama səviyyəsi əhəmiyyətli dərəcədə artırılıb. Bu isə modelin daha sürətli və dəqiq nəticələr təqdim etməsinə imkan yaradır.
Yeni modelin diqqət çəkən əsas xüsusiyyətlərindən biri ABŞ çiplərindən asılı olmadan işləməsidir. DeepSeek bu məqsədlə Çin texnologiya nəhəngi Huawei ilə əməkdaşlıq edib. Beləliklə, sistem Nvidia kimi xarici istehsalçılardan asılılığı azaltmağa yönəlib.
Açıq mənbə prinsipi ilə təqdim olunan V4 modelinin geniş istifadəçi auditoriyasına çatdırılması planlaşdırılır. Bununla belə, şirkətin sürətli inkişafı mübahisələrə də səbəb olub. ABŞ-da bəzi texnologiya şirkətləri DeepSeek-i öz modellərindən məlumatların qanunsuz şəkildə istifadə olunması ilə bağlı ittiham edir.
Ekspertlər qeyd edir ki, bu yeni modelin təqdimatı ABŞ və Çin arasında süni intellekt sahəsində rəqabəti daha da gücləndirə bilər.
Mənbə: TrtHaber