Bugun.tv– xəbər verir ki, İllham Əliyev və Türk Dövlətləri Təşkilatının Dövlət başçılarının qeyri-rəsmi Zirvə görüşündə iştirak edən digər prezidentlər Turkistan şəhərində Türk Sivilizasiyası Mərkəzinin onlayn təməlqoyma mərasimində iştirak ediblər.
Dövlət başçılarına layihə barədə ətraflı təqdim olunan məlumatda bildirilib ki, Türk Sivilizasiyası Mərkəzi türk xalqlarının zəngin tarixi, mədəni və mənəvi irsinin qorunması, öyrənilməsi və təbliği məqsədilə yaradılır.
Eyni zamanda qeyd olunub ki, ən müasir standartlara uyğun inşa ediləcək mərkəzin əsas məqsədi türk sivilizasiyasının dünya tarixində mühüm yer tutduğunu, dərin fəlsəfi düşüncəyə və güclü dövlətçilik ənənələrinə malik olduğunu nümayiş etdirməkdir.
Mərasimdən sonra “GovTech” rəqəmsal həllərinin təqdimatı keçirilib.
Təqdimat zamanı Qazaxıstanda süni intellekt və rəqəmsal texnologiyalar sahəsində həyata keçirilən layihələr barədə məlumat verilib.
Həmçinin vurğulanıb ki, türk dövlətləri arasında rəqəmsal inkişaf və süni intellekt sahəsində əməkdaşlığın genişləndirilməsi üçün böyük potensial mövcuddur.
Mənbə: prezident.az