Bugun.tv xəbər verir ki, mütəxəssislər havaların kəskin isti keçdiyi günlərdə birbaşa buz kimi soyuq suya tullanmağın sağlamlıq üçün ciddi risklər yarada biləcəyi barədə xəbərdarlıq ediblər.
Həkimlərin sözlərinə görə, yüksək temperatur şəraitində orqanizmin damarları genişlənmiş vəziyyətdə olur. Bu zaman qəfil şəkildə çox soyuq suya daxil olmaq damarların kəskin spazmına səbəb ola bilər. Belə vəziyyət ürək-damar sistemi üçün əlavə yük yaradır və xüsusilə ürək xəstəlikləri olan şəxslər üçün təhlükəli hesab olunur.
Mütəxəssislər bildirirlər ki, qəfil temperatur fərqi bəzi hallarda başgicəllənmə, huşun itməsi, ürək ritminin pozulması və əzələ qıcolmaları ilə nəticələnə bilər. Soyuq suyun təsiri altında yaranan qıcolmalar isə suda boğulma riskini artırır.
Həkimlər isti havalarda dənizə, gölə və ya hovuza daxil olarkən əvvəlcə bədəni tədricən suya uyğunlaşdırmağı tövsiyə edirlər. Onların fikrincə, suya birdən-birə baş vurmaq əvəzinə, əvvəlcə əlləri, üzü və bədənin digər hissələrini islatmaq daha təhlükəsizdir.
Mütəxəssislər vurğulayırlar ki, xüsusilə yaşlı insanlar, uşaqlar və xroniki ürək-damar xəstəliklərindən əziyyət çəkən şəxslər bu məsələdə daha ehtiyatlı olmalıdırlar.
Mənbə: mail.ru