Bugun.tv – Bu gün kredit kartları və nağd pul gündəlik həyatımızın ayrılmaz hissəsidir.
Lakin kağız və metal pulların meydana çıxmasından əvvəl insanlar borclarını ödəmək və ticarət aparmaq üçün olduqca qeyri-adi vasitələrdən istifadə ediblər.
Tarix boyu müxtəlif xalqlar ödəniş vasitəsi kimi pendirdən tutmuş balina dişlərinə qədər fərqli əşyalardan yararlanıblar. Budur, dünyanın ən maraqlı 5 qədim ödəniş vasitəsi.
1. Heyvan dişləri
Keçmişdə dişlər yalnız bədənin bir hissəsi deyil, həm də sərvət göstəricisi hesab olunurdu. Fici adalarında cilalanmış balina dişləri, Papua Yeni Qvineya və Solomon adalarında isə it, donuz və delfin dişləri kanoe, ərzaq və hətta sülh sazişləri müqabilində istifadə edilirdi.
2. Parmesan pendiri
İtaliyada XIII əsrdən etibarən parmesan pendiri yalnız qida məhsulu deyil, həm də investisiya vasitəsi kimi qiymətləndirilirdi. Onun dəyəri o qədər yüksək idi ki, bu gün də İtaliyadakı bəzi banklar kreditlər üçün parmesan başlarını girov kimi qəbul edir.
3. Dəniz qabıqları
Dünyanın müxtəlif bölgələrində yaşayan xalqlar əsrlər boyu dəniz qabıqlarından pul kimi istifadə ediblər. Şimali Amerikada vampum muncuqları, Asiya və Afrikada isə kauri qabıqları XX əsrə qədər ticarətdə mühüm rol oynayıb.
4. Çay kərpicləri
Mərkəzi və Şimali Asiyada sıxılmış çay blokları ticarətin əsas vasitələrindən biri idi. Daşınmasının asan olması və uzun müddət xarab olmaması səbəbindən İpək Yolu tacirləri üçün böyük əhəmiyyət daşıyırdı. Hətta XX əsrin əvvəllərində Monqolustan və Tibetin bəzi bölgələrində çay gümüşdən daha qiymətli hesab edilirdi.
5. Duz külçələri
Qədim Efiopiyada duz “ağ qızıl” adlandırılırdı. Dördbucaqlı külçələr şəklində satılan duz həm ödəniş vasitəsi, həm də qida üçün vacib məhsul sayılırdı. Mütəxəssislər bildirirlər ki, ingilis dilindəki “salary” (maaş) sözünün mənşəyi də Roma əsgərlərinə verilən duz payı ilə bağlıdır.
Tarix göstərir ki, insanların ödəniş etmək üçün istifadə etdiyi vasitələr zamanla dəyişsə də, ticarətin və mübadilənin əhəmiyyəti həmişə eyni qalıb.
Mənbə: Ensonhaber