İsrailin Hindistandakı keçmiş səfiri Daniel Carmon işğal olunmuş Şərqi Qüds ərazisində fransız rahibəsinə edilən hücumu “yəhudi terrorizmi” kimi qiymətləndirib.
İsrail polisinin məlumatına görə, 36 yaşlı israilli şəxs rahibəyə hücum etdikdən sonra saxlanılıb. Hücumun “irqi motivli” olduğu bildirilib. Hadisə zamanı rahibənin yerə yıxılaraq xəsarət aldığı qeyd olunur.
Daniel Carmon sosial media platforması X-də paylaşım edərək bildirib ki, küçədə sakit şəkildə hərəkət edən rahibə qeyri-yəhudi olduğu üçün hədəf seçilib və zorakılığa məruz qalıb. O, bu hadisəni kəskin şəkildə pisləyərək “əgər bu terrorizm deyilsə, bəs nədir?” sualını ünvanlayıb.
Hadisəyə Fransa konsulluğu Qüds da reaksiya verib. Konsulluq yaydığı açıqlamada hücumu qətiyyətlə pisləyib, zərərçəkənin vəziyyətini izlədiklərini və hadisəni törədən şəxsin məsuliyyətə cəlb olunmasını tələb etdiklərini bildirib.
Polis isə zorakılığın bütün formalarına, xüsusilə dini və irqi zəmində baş verən hücumlara ciddi yanaşıldığını vurğulayıb.
Qeyd olunur ki, son illərdə Qüds şəhərində müsəlman və xristian din xadimlərinə qarşı hücumların artdığı müşahidə edilir. Kilsə rəhbərləri İsrail hakimiyyətini belə halların qarşısını almaq üçün daha sərt tədbirlər görməyə çağırıb.
Mənbə: AnadoluAgentliyi