Bugun.tv xəbər verir ki, Litvada fəaliyyətə başlayan yeni hökumət ABŞ hərbi qüvvələrinin ölkə ərazisində uzunmüddətli və daimi əsaslarla yerləşdirilməsini prioritet istiqamətlərdən biri kimi müəyyənləşdirib.
Baş nazirin rəhbərlik etdiyi koalisiya hökumətinin proqramında qeyd olunur ki, regionda təhlükəsizlik vəziyyətinin pisləşməsi və Rusiyanın hərbi fəaliyyətinin artması NATO-nun şərq cinahında müdafiə imkanlarının daha da gücləndirilməsini zəruri edir. Rəsmi Vilnüs hesab edir ki, ABŞ hərbçilərinin daimi iştirakı Baltik regionunda çəkindirici amil rolunu oynayacaq.
Hazırda Litvada rotasiya prinsipi əsasında ABŞ hərbçiləri və texnikası yerləşdirilib. Lakin ölkə rəhbərliyi bunu kifayət hesab etmir və Vaşinqtonla uzunmüddətli hərbi əməkdaşlığın genişləndirilməsi istiqamətində danışıqlar aparmağa hazır olduğunu bildirir.
Litva NATO üzvləri arasında müdafiə xərclərini artıran ölkələrdən biridir. Hökumət yaxın illərdə hərbi büdcənin ÜDM-in 5 faizinə çatdırılmasını hədəfləyir. Ekspertlərin fikrincə, ABŞ qüvvələrinin daimi yerləşdirilməsi Baltik ölkələrinin təhlükəsizliyinin möhkəmləndirilməsi baxımından mühüm addım ola bilər.
Mənbə: Reuters