Bugun.tv xəbər verir ki, Milli Cəbhə Partiyasının başqan müavini, politoloq Məhəmməd Əsədullazadə Ermənistan və Gürcüstandan Azərbaycan Alban irsi ilə bağlı səsləndirilən iddiaların regional təhlükəsizlik baxımından diqqət çəkdiyini bildirib.
Politoloqun sosial media hesabındakı sözlərinə görə, son günlər Ermənistan, Gürcüstan və Azərbaycanda Alban irsi ilə bağlı müxtəlif fikirlər səsləndirilir. O, xüsusilə Azərbaycanın xristian irsinə dair iddiaların gündəmə gətirilməsinə diqqət çəkib.
Məhəmməd Əsədullazadə bildirib ki, Gürcüstan Patriarxlığının Qax rayonunda yerləşən Kürmük məbədi ilə bağlı açıqlamaları, həmçinin Ermənistanın Qarabağdakı Alban irsi ilə bağlı mövqeyi məsələnin yalnız dini və mədəni müstəvidə qalmadığını göstərir. Onun fikrincə, bu yanaşmalar Cənubi Qafqazda dini və mədəni zəmində gərginlik yarada bilər.
Politoloq qeyd edib ki, Azərbaycan ərazisində yerləşən tarixi və dini irslə bağlı ərazi və mənsubiyyət xarakterli iddialar ölkə üçün həssas məsələdir.
Onun sözlərinə görə, bir neçə gün əvvəl Tbilisidə Azərbaycan, Türkiyə, Ermənistan və Gürcüstan nümayəndələrinin görüş keçirməsi və maliyyə-iqtisadi əməkdaşlıq məsələlərini müzakirə etməsi regionda yeni əməkdaşlıq imkanlarının formalaşdığını göstərir.
Məhəmməd Əsədullazadə hesab edir ki, Ermənistan və Gürcüstan kilsələrinin Rusiya ilə tarixi və institusional əlaqələri də bu proses kontekstində nəzərdən keçirilməlidir. O, belə dini platformaların regionda təsir vasitəsi kimi istifadə oluna biləcəyini iddia edib.
Politoloq vurğulayıb ki, Azərbaycan üçün əsas məsələ tarixi-mədəni irsin qorunması və bu məsələlərin siyasiləşdirilməsinə yol verilməməsidir.