İranda hakimiyyət daxilində ABŞ-la əldə olunmuş memorandum ətrafında fikir ayrılıqları dərinləşir.
Bugun.tv xəbər verir ki, bu fikirləri siyasi ekspert Məhəmməd Əsədullazadə sosial media hesabında paylaşıb.
Ekspertin sözlərinə görə, İranda mühafizəkar qanad islahatçıların ABŞ ilə əldə etdiyi razılaşmanın həyata keçirilməsinə mane olmağa çalışır.
O bildirib ki, SEPAH-a yaxın media orqanları və bir sıra mühafizəkar deputatlar Prezident Məsud Pezeşkianı, xarici işlər nazirini və parlament sədrini sərt tənqid edir və razılaşmaya qarşı çıxırlar.
Məhəmməd Əsədullazadə hesab edir ki, Hörmüz boğazında baş verən son hadisələr də ölkə daxilində memorandumun pozulmasına yönəlmiş cəhdlərlə əlaqəli ola bilər. O, həmçinin prezident və xarici işlər nazirinə qarşı təzyiqlərin artacağını və hətta təhlükəsizlik risklərinin yarana biləcəyini iddia edib.
Ekspert qeyd edib ki, ABŞ-ın İrana qarşı yeni genişmiqyaslı hərbi əməliyyatlara başlaması mühafizəkarların mövqeyini daha da gücləndirə bilər. Onun fikrincə, hazırkı şəraitdə memorandumun gələcəyi ciddi suallar doğurur.