Bugun.tv xəbər verir ki, ABŞ-ın Nyu-York şəhərində yerləşən məşhur “Park Slope Food Coop” qida kooperativinin üzvləri İsrail və işğal olunmuş Fələstin ərazilərində istehsal olunan bəzi məhsulların boykot edilməsinə səs veriblər.
“The Guardian” nəşrinin məlumatına görə, Bruklində fəaliyyət göstərən və 17 mindən çox üzvü olan kooperativdə keçirilən virtual toplantıda iştirak edən üzvlərin 68 faizi boykot qərarını dəstəkləyib. Qərarın əsasən tahini, bibər, xurma və digər məhsulları əhatə edəcəyi bildirilib.
Məlumata əsasən, səsvermədən əvvəl aylarla davam edən mübahisəli kampaniyalar və fikir ayrılıqları yaşanıb. Boykotu dəstəkləyən qruplar bunu kooperativin sosial ədalət və etik alış-veriş ənənələrinin davamı kimi qiymətləndiriblər. Onlar daha əvvəl aparteid dövründə Cənubi Afrika və Çili məhsullarına qarşı da oxşar boykotların tətbiq olunduğunu xatırladıblar.
Boykota qarşı çıxan tərəflər isə qərarın kooperativ daxilində parçalanma yaratdığını və siyasi gərginliyi artırdığını bildiriblər. Müzakirələr zamanı antisemitizm və ərəb əleyhinə ifadələrlə bağlı ittihamların da gündəmə gəldiyi qeyd olunub.
Kooperativ rəhbərliyi üzvlərə göndərdiyi açıqlamada qarşıdurmalar, təhdid məktubları, aqressiv telefon zəngləri və sosial mediada düşmənçilik hallarının artdığını vurğulayıb. Rəhbərlik bütün müzakirələrin sivil çərçivədə aparılmasının vacibliyini qeyd edib.
Mənbə: The Guardian