Bugun.tv xəbər verir ki, ABŞ alimləri aşağı zülallı və az miqdarda metioninlə zənginləşdirilmiş pəhrizin ömrü uzada və sağlam qocalmağa kömək edə biləcəyini müəyyən ediblər.
Aşağı zülallı bitki mənşəli qidalanma
Məlumdur ki, Cənubi Avropada uzunömürlü insanların üstünlük verdiyi Aralıq dənizi tipli aşağı zülallı bitki mənşəli qidalanma yüksək həyat müddəti ilə əlaqələndirilir. Lakin belə qidalanmanın yaşlı dövrdə orqanizmin kövrəkləşməsi riskini artırması ilə bağlı narahatlıqlar mövcuddur. Bunun əsas səbəblərindən biri bitki mənşəli qidalarda əvəzolunmaz amin turşularının, xüsusilə də yumurta, ət və süd məhsullarında olan metioninin az olmasıdır. Metionin əzələ kütləsinin qorunması və zəifliyin qarşısının alınması üçün vacib hesab edilir.
Elmi nəticələri Cell Metabolism jurnalında dərc olunan yeni araşdırmada Valter Lonqo rəhbərliyində çalışan alimlər aşağı zülallı pəhrizə az, lakin kifayət qədər metionin əlavə etməyin faydalı olub-olmayacağını yoxlayıblar.
Aparılan tədqiqatlar və nəticələri
Tədqiqat çərçivəsində 20 aylıq siçanlar dörd qrupa bölünüb və standart, yüksək yağlı və şəkərli qərb pəhrizi, ketogen pəhriz və “uzunömürlülük pəhrizi” (LDMM) ilə qidalandırılıblar. Sonuncu pəhriz aşağı zülallı olsa da, optimal dozada metioninlə zənginləşdirilib.
Nəticələr göstərib ki, LDMM pəhrizi ilə qidalanan siçanlar daha uzun ömür sürüb, daha az piy toplayıb və digər qruplarla müqayisədə yaşlanma ilə əlaqəli kövrəklik əlamətlərini daha az göstəriblər.
Alimlər bildiriblər ki, cəmi bir amin turşusunun – metioninin səviyyəsinin dəyişdirilməsi metabolizmdə gözlənilməz dərəcədə böyük dəyişikliklərə səbəb olub. Bu isə göstərir ki, yalnız qəbul edilən zülalın miqdarı deyil, onun amin turşusu tərkibi də sağlam qocalma baxımından mühüm rol oynayır.
Araşdırma zamanı LDMM pəhrizi tətbiq edilən siçanların qan analizlərində ürək-damar və maddələr mübadiləsi göstəricilərinin yaxşılaşdığı, həmçinin metabolizm və qocalma proseslərinə təsir edən GLP-1 hormonunun səviyyəsinin artdığı müəyyən edilib.
Diqqətçəkən məqamlardan biri də odur ki, həmin siçanlar digər qruplarla müqayisədə daha çox qida qəbul etsələr də, yağ kütləsini azaldıb, əzələ kütləsini qoruyublar. Bunun yalnız metionin səviyyəsinin aşağı, lakin yetərli olduğu hallarda mümkün olduğu vurğulanıb.
Alimlərin gələcək klinik sınaqları
Bundan əlavə, alimlər 200 mindən çox insanın qidalanma və sağlamlıq göstəricilərini də təhlil ediblər. Məlum olub ki, çoxlu heyvani zülal və buna uyğun olaraq yüksək miqdarda metionin qəbul edən insanlarda piylənmənin yayılması və ikinci tip diabet riski daha yüksəkdir. Onlarda diabetə tutulma ehtimalı az və ya heç heyvani zülal qəbul etməyənlərlə müqayisədə iki dəfə çox olub.
Tədqiqat müəlliflərinin fikrincə, “uzunömürlülük pəhrizi” əsasən Aralıq dənizi qidalanmasına əsaslanan, demək olar ki, tam vegetarian və ya veqan menyudan ibarətdir. Lakin metionin və digər əvəzolunmaz amin turşularının kifayət qədər təmin olunması üçün az miqdarda balıq və bəzən yumurta qəbuluna da icazə verilir.
Alimlər növbəti mərhələdə bu pəhrizin insanlar üzərində klinik sınaqlarını keçirməyi planlaşdırırlar.
Mənbə: mail.ru