Bugun.tv xəbər verir ki, onkoloq Vladimir İvaşkov ultrasəs müayinəsinin (USM) nəticələrində rast gəlinən və xəstələrdə narahatlıq yaradan 4 tibbi ifadəni izah edib.
Mail.ru-nun məlumatına görə, həkim bildirib ki, tibbi nəticələrdə yazılan ayrı-ayrı sözləri görərək dərhal xərçəngdən şübhələnmək düzgün deyil. Onun sözlərinə görə, diaqnoz yalnız müayinə nəticələrinin ümumi mənzərəsi, dəyişikliklərin ölçüsü və dinamikası nəzərə alınmaqla müəyyənləşdirilir.
İvaşkovun qeyd etdiyi ilk ifadə “hiperplaziya”dır. Bu söz hüceyrələrin sayının artması və toxumanın böyüməsi deməkdir. Məsələn, uşaqlığın daxili qişasında hiperplaziya hormonal dəyişikliklərlə əlaqəli ola bilər və öz-özlüyündə xərçəng diaqnozu deyil.
İkinci ifadə “atipiya”dır. Həkimə görə, bu zaman hüceyrələrin forma və ölçüsündə dəyişikliklər müşahidə olunur. Atipiya daha diqqətli nəzarət tələb edə bilər, lakin avtomatik olaraq xərçəng anlamına gəlmir.
Üçüncü ifadə “ocaqlı dəyişikliklər”dir. Bu anlayış kistadan tutmuş əvvəlki iltihabdan qalan çapıq toxumasına qədər müxtəlif halları ifadə edə bilər. Belə dəyişikliklərin mahiyyətini müəyyənləşdirmək üçün onların zamanla necə dəyişdiyi və lazım gəldikdə əlavə müayinələrin nəticələri nəzərə alınır.
Dördüncü ifadə isə “qeyri-homogen struktur”dur. İvaşkov bildirir ki, canlı orqanların toxumasında müxtəlif sıxlıq və qan təchizatına malik sahələrin olması mümkündür və bu ifadə hər zaman təhlükəli xəstəlik demək deyil.
Həkim pasiyentlərə USM və ya MRT nəticəsində yalnız bir sözə əsasən nəticə çıxarmamağı tövsiyə edib. Onun sözlərinə görə, müayinə cavabı görüntünün təsviridir, yekun diaqnoz isə həkim müayinəsi və lazım gəldikdə əlavə araşdırmalar əsasında qoyulur.
Mənbə: mail.ru