Bugun.tv xəbər verir ki, Polşa və İngiltərə müdafiə və təhlükəsizlik sahəsində genişmiqyaslı əməkdaşlığı nəzərdə tutan yeni saziş imzalayıb. Razılaşmanın siber təhlükəsizlikdən tutmuş birgə silah istehsalına qədər geniş sahələri əhatə etdiyi bildirilib.
Londonda keçirilən rəsmi mərasimdə Polşa Baş naziri Donald Tusk və Böyük Britaniyanın Baş naziri Keir Starmer sənədi imzalayıblar. Tərəflər görüşdən sonra RAF Northolt Hərbi Hava Bazasında keçirilən mərasimdə iştirak ediblər.
İkinci Dünya Müharibəsi dövründə Polşa pilotlarının da xidmət etdiyi hərbi bazada keçirilən tədbir iki ölkə arasında tarixi əlaqələrə də diqqət çəkib.
Müqaviləyə əsasən, tərəflər müdafiə, təhlükəsizlik və siber təhlükəsizlik sahələrində daha sıx koordinasiya aparacaq, NATO çərçivəsində əməkdaşlığı gücləndirəcək və ortaq təhlükələrə qarşı daha çevik reaksiya mexanizmləri yaradacaq.
Sazişin ən mühüm bəndlərindən biri yeni nəsil silah sistemlərinin birgə istehsalıdır. Bu çərçivədə inkişaf etmiş sursat sistemləri, hava və raketdən müdafiə texnologiyaları və orta mənzilli raket sistemlərinin birgə hazırlanması planlaşdırılır.
Böyük Britaniyanın Baş naziri Keir Starmer bu sazişi iki ölkə münasibətlərində son illərin ən mühüm addımlarından biri kimi qiymətləndirib. Polşa Baş naziri Donald Tusk isə əməkdaşlığın regional təhlükəsizlik risklərinə qarşı vacib olduğunu vurğulayıb.
Rəsmi açıqlamalarda Rusiyadan gələn təhlükələrə xüsusi diqqət çəkildiyi, bu əməkdaşlığın Avropada təhlükəsizlik balansını gücləndirəcəyi qeyd olunub.
Mənbə: Ensonhaber