Qəbirlərə baxım xidməti yaradılıb. Yəni məzarlara qulluq göstəriləcək. Bəs, bu xidmət necə və hansı formada həyata keçiriləcək? Üstəlik qiymətlər də məlumdur.
Paytaxt ərazisindəki qəbiristanlıqlarda təmiz məzarlarla yanaşı, səliqəsiz məzarlara da rast gəlmək mümkündür.
Bəzən insanlar öz yaxınlarının məzarını ziyarət edib, onun ətrafında təmizlik işləri apara bilmirlər. Nəticədə məzarlıqda səliqəsiz görüntü yaranır. Burada həm tullantılar artıb, həm də qəbirlərin içərisini ot basıb.
Doğmalarının məzarını tez-tez ziyarət edə bilməyənlər üçün baxım xidməti yaradılıb. Amma bu xidmətlər müəyyən ödəniş qarşılığında bəzi şirkətlər tərəfindən həyata keçirilir. Onlar məzarların yanına çiçək qoyur və təmizlik işləri aparırlar. İnsanların bu ideyaya yanaşması isə müxtəlifdir.
Mövzu ilə bağlı Bugun.tv olaraq, şəhərdə sorğu apardıq. Paytaxt sakinlərindən biri məsələyə belə yanaşdı: “Yaxşı fikirdir. Müəyyən səbəblərdən hər dəfə qəbirstanlığa gəlib, məzarı təmizləmək olmur. Bunu kim düşünübsə, savab iş görüb”.
Digər sakin isə bildirdi ki, hər kəs gəlib əzizlərini özləri ziyarət etsə, daha yaxşı olar. Ölüsünə hörmət edən adamlar onu yaddan çıxarmasınlar. Vaxtaşırı gəlib həm ziyarət etsinlər, dualar oxusunlar, həm də qəbiri səliqəyə salsınlar.
Qanunvericiliyə əsasən, qəbirlərə baxım və idarəçiliyi yerli bələdiyyələrin tabeliyindədir. Millət vəkili Azər Badamov deyir ki, qanun qəbiristanlıqlarda özəl şirkətlərin xidmətini qadağan etmir.
Millət vəkili onu da qeyd etdi ki, qəbir xidmətlərinin göstərilməsi üçün belə bir müəssisənin yaradılması yaxşı fikirdir. Çünki ola bilsin ki, əzizini itirmiş hər hansı bir vətəndaş qəbiristanlıqdakı xidmətdən narazıdır. Özəl şirkətlərlə müqavilə bağlayıb, qarşılıqlı ödəniş və razılıq əsasında daha yaxşı xidmətlə yararlanmaq imkanı əldə edə bilər. Burada mütləq şəkildə hər hansısa bir müəssisənin bu xidmətdən yararlanmalı kimi tələb yoxdur. Qanunda nəzərdə tutulduğu kimi heç bir müəssisə olmasa da, bələdiyyələr tərəfindən qəbiristanlıqlar qorunmalıdır. Bütün xidmətlər bələdiyyələr tərəfindən həyata keçirilməlidir.
Bəs, görəsən bələdiyyələr bu səsləndirilən fikirlərdən xəbərdardırmı? Bəzi qəbiristanlıqlardakı mənzərəyə baxdıqda bu elə də inandırıcı görünmür.
Onu da qeyd edək ki, məzarlıqlara baxım xidməti aylıq 30-40 və illik 300-400 manat olmaqla vətəndaşlara təklif edilir.