“ABŞ-ın təzyiqi ilə heç vaxt qüvvəyə minməmiş Nüvə Sınaqlarının Hərtərəfli Qadağası Müqaviləsi (CTBT) ilə bağlı vəziyyət getdikcə daha çox narahatlığa səbəb olur. Çünki Vaşinqton açıq şəkildə nüvə sınaqlarını bərpa etməkdə qərarlıdır. Müqavilənin mövcud olduğu dörddə bir əsrdən artıq müddət ərzində qüvvəyə minməmiş vəziyyətə görə məsuliyyət tamamilə onu ratifikasiya etməkdən qəti şəkildə imtina edən və sınaqları bərpa etmək niyyətində olduğunu nümayiş etdirən ABŞ-ın üzərinə düşür”.
Bugun.tv TASS-a istinadən bildirir ki, bunu Rusiya xarici işlər nazirinin müavini Sergey Ryabkov deyib.
“Biz baş verənlərə qarşı biganə qala bilmərik. Əgər ABŞ buna baxmayaraq, belə bir addım atmağa qərar verərsə və nüvə sınaqları keçirən ilk ölkə olsa, biz proporsional cavab verməyə məcbur olacağıq. Heç kimdə qlobal strateji paritetin pozula biləcəyi ilə bağlı təhlükəli illüziyalar olmamalıdır”, – deyə o bildirib.
Qeyd edək ki, bundan əvvəl Rusiya prezidenti Vladimir Putin Federal Məclisə müraciətində Müdafiə Nazirliyinə lazım gələrsə, nüvə sınaqları keçirməyə hazırlaşmağı tapşırmışdı. Rusiya onları həyata keçirən ilk ölkə olmayacaq.