Səudiyyə Ərəbistanının Həcc və Ümrə Nazirliyi çoxgirişli ümrə vizasından istifadə qaydaları və bu viza sahiblərinə təqdim olunan yeni imkanlarla bağlı açıqlama yayıb.
Nazirliyin məlumatına görə, çoxgirişli ümrə vizası sahibinə qüvvədə olduğu müddət ərzində Səudiyyə Ərəbistanına bir neçə dəfə giriş-çıxış etmək imkanı verir. Bunun üçün ziyarətçilər hər səfərdən əvvəl nazirliyin “Nusuk” tətbiqi vasitəsilə bütün hüquqi tələbləri yerinə yetirməli və zəruri prosedurları tamamlamalıdırlar.
Yeni qaydalara əsasən, viza verildiyi tarixdən etibarən 365 gün (1 il) qüvvədə olacaq və bu müddət ərzində ibadət məqsədilə ölkəyə dəfələrlə daxil olmaq mümkün olacaq. Lakin bir illik dövr ərzində ölkədə ümumi qalma müddəti 90 gün ilə məhdudlaşdırılıb. Hər çıxışdan sonra növbəti giriş üçün qalan qalma müddəti sistem tərəfindən avtomatik yenilənəcək.
Nazirlik bildirib ki, vizadan istifadə etmək üçün ziyarətçilər hər girişdən əvvəl təsdiqlənmiş xidmət paketlərindən birini seçməli və “Nusuk” tətbiqi üzərindən rəsmi ümrə icazəsi almalıdırlar.
Eyni zamanda vurğulanıb ki, çoxgirişli ümrə vizası Həcc mövsümündə ölkəyə giriş üçün istifadə edilə bilməyəcək. Hicri təqvimlə 1 Zilqədə – 13 Zilhiccə tarixləri arasında bu viza sahiblərinin ölkəyə daxil olmasına icazə verilməyəcək. Nazirlik ziyarətçilərə səfərlərini bu məhdudiyyətləri nəzərə alaraq planlaşdırmağı tövsiyə edib.
Mənbə: EnSonHaber