Bugun.tv xəbər verir ki, saqqız, diş məcunu, mürəbbə və bəzi digər məhsullarda şəkər əvəzedicisi kimi istifadə olunan ksilitolun yüksək səviyyəsi ürək tutması və insult riskinin artması ilə əlaqələndirilib. The Guardian yazır ki, yeni genişmiqyaslı araşdırmada 17 710 insanın məlumatları təhlil edilib.
Araşdırmada qanda ksilitol səviyyəsi ən yüksək olan insanların əsas ürək-damar hadisəsi keçirmə ehtimalının ən aşağı səviyyəyə malik şəxslərlə müqayisədə daha yüksək olduğu müəyyənləşdirilib. Altı illik müşahidə zamanı bu qrupda ürək tutması, insult və ya ölüm daxil olmaqla ciddi ürək-damar hadisələrinin riski 58 faiz daha yüksək olub. Daha uzunmüddətli məlumatlarda isə risk fərqi 18 faiz təşkil edib.
Tədqiqatçılar ksilitolun qan laxtalanmasına təsir göstərə biləcəyini də bildirirlər. Lakin alimlər mühüm bir məqamı vurğulayırlar: araşdırma müşahidə xarakterlidir və səbəb-nəticə əlaqəsini sübut etmir. Buna görə ksilitolun insanlarda ürək-damar xəstəliklərinə birbaşa səbəb olduğunu söyləmək hələ tezdir.
Mütəxəssislər nəticələrin təsdiqlənməsi üçün əlavə araşdırmaların aparılmasını vacib hesab edirlər.
Mənbə: The Guardian