Bugun.tv xəbər verir ki, ABŞ-ın Tennessi ştatının Çattanoqa şəhərində 2030-cu ildə istifadəyə veriləcək yeni federal məhkəmə binasının layihəsi Prezident Donald Trampın “Federal memarlığı yenidən gözəlləşdirək” adlı sərəncamından sonra təqdim edilən ilk iri dövlət layihəsi kimi diqqət çəkib.
CNN-in məlumatına görə, yeni məhkəmə binası qədim yunan memarlığı ilə Art Deco üslubunun sintezindən hazırlanıb. Layihənin müəllifi olan memarlıq şirkəti HOK binanı müasir yanaşma ilə klassik elementlərin birləşməsi kimi təqdim etsə də, layihə memarlar və tarixçilər arasında ciddi müzakirələr yaradıb.
Bəzi ekspertlər binanın dövlət hakimiyyətinin gücünü simvolizə etdiyini bildirirlər. Digərləri isə onun 1930-cu illərin avtoritar dövlətlərinin memarlıq üslubunu xatırlatdığını və məhkəmələrin açıq, şəffaf obrazına uyğun gəlmədiyini vurğulayırlar.
Layihəni dəstəkləyən Milli Vətəndaş İncəsənəti Cəmiyyəti klassik memarlığın dövlət binaları üçün daha uyğun olduğunu bildirərək yeni məhkəməni Trampın memarlıq siyasətinin uğurlu nümunəsi adlandırıb.
CNN həmçinin qeyd edir ki, Trampın sərəncamı federal binaların əsasən klassik və ənənəvi üslubda layihələndirilməsini təşviq edir. Tənqidçilər isə hesab edirlər ki, hökumətin memarlıq üslubunu müəyyən etməsi yaradıcı azadlığı məhdudlaşdırır və memarlığın siyasi mübarizə vasitəsinə çevrilməsinə səbəb ola bilər.
Mənbə: CNN