ABŞ Prezidenti Donald Trump İranın Vaşinqtondan Hörmüz boğazı ilə bağlı addım gözlədiyini iddia edib. O bildirib ki, Tehran boğazın “mümkün qədər tez” yenidən açılmasını istəyir.
Tramp sosial media platformasında paylaşım edərək İranın “çökmə vəziyyətində” olduğunu irəli sürüb və ölkənin ABŞ-la əlaqə saxlayaraq boğazın açılmasını xahiş etdiyini qeyd edib. Bununla belə, o, bu iddiaları təsdiqləyən konkret detallar təqdim etməyib və rəsmi Tehran tərəfindən də dərhal açıqlama verilməyib.
Məlumatlara görə, bu açıqlamalar İranın boğazın açılması ilə bağlı irəli sürdüyü təkliflər fonunda səsləndirilib. The New York Times nəşri yazır ki, məsələ ilə bağlı müzakirələr Ağ Ev-də keçirilən iclasda gündəmə gəlib.
İddialara əsasən, İran ABŞ-dan limanlara tətbiq olunan blokadanın aradan qaldırılmasını, atəşkəsin uzadılmasını və ya daimi xarakter almasını, həmçinin nüvə danışıqlarının yalnız dəniz məhdudiyyətləri aradan qaldırıldıqdan sonra başlanmasını istəyir. Bu isə Vaşinqton üçün əsas mübahisə mövzusu olan nüvə proqramı məsələsini açıq saxlayır.
Qeyd edək ki, ABŞ və İsrailin fevralın 28-də İrana qarşı həyata keçirdiyi hərbi əməliyyatlardan sonra regionda gərginlik artıb. Sonradan tərəflər arasında Pakistan vasitəçiliyi ilə atəşkəs elan olunub və bu razılaşma daha sonra uzadılıb.
Mənbə: AnadoluAgentliyi