Bugun.TV xəbər verir ki, Ukrayna Macarıstanda Viktor Orbanın parlament seçkisində məğlubiyyətini Kiyev üçün müsbət nəticə kimi qarşılayıb. Reuters-in məlumatına görə, Orban uzun illər Avropa İttifaqında Ukraynaya qarşı ən sərt mövqe tutan liderlərdən biri olub və Kiyevə Aİ tərəfindən maliyyə dəstəyinin göstərilməsinə maneələr yaradıb.
Pyotr Magyarın rəhbərlik etdiyi TİZA Partiyasının seçkidə qələbəsi Ukrayna ilə Macarıstan arasında münasibətlərin dəyişə biləcəyi ilə bağlı gözləntiləri artırıb. Reuters qeyd edir ki, Magyar Orban kimi Ukraynanın açıq rəqibi hesab edilmir. Bununla belə, onun Kiyevin Aİ-yə sürətləndirilmiş üzvlüyünü dəstəkləmədiyini açıqlaması yeni hökumətin Ukraynaya münasibətdə tamamilə fərqli xətt götürəcəyinə zəmanət vermir.
Ukrayna tərəfi isə seçkinin nəticəsini ehtiyatlı nikbinliklə qarşılayıb. Kiyevdə hesab edilir ki, Orbanın hakimiyyətdən getməsi Macarıstanın Aİ daxilində Ukraynaya maliyyə və siyasi dəstəyə mane olan mövqeyinin dəyişməsinə imkan yarada bilər.
Reuters-in məlumatına görə, əsas gözləntilərdən biri Macarıstanın Ukraynaya nəzərdə tutulan 90 milyard avroluq Aİ kreditinə veto qoymamasıdır. Bu vəsait Kiyevin müharibə şəraitində maliyyə ehtiyaclarının qarşılanması baxımından mühüm əhəmiyyət daşıyır.
Mənbə: Reuters