Ukrayna Rusiya ərazisində təxminən 1500 kilometr uzaqlıqda yerləşən neft obyektini pilotsuz uçuş aparatı ilə hədəfə alıb. Hücumdan sonra obyektdə güclü yanğın baş verdiyi bildirilir.
Ukraynanın təhlükəsizlik qurumları Rusiyanın daxili bölgələrinə yönəlmiş hücumları genişləndirərək Perm şəhəri yaxınlığında yerləşən strateji neft obyektinə zərbə endirib. Ukraynadan xeyli uzaqda yerləşən obyektə təşkil olunan PUA hücumundan sonra ərazidə genişmiqyaslı yanğın qeydə alınıb.
Məlumata görə, hücum Ukrayna Təhlükəsizlik Xidməti (SBU) tərəfindən həyata keçirilib və Rusiyanın enerji infrastrukturu üçün mühüm əhəmiyyət daşıyan obyekt hədəfə alınıb. Bildirilir ki, zərbə endirilən obyekt Rusiyanın boru kəməri operatoru “Transneft” şəbəkəsinə daxildir.
Hadisədən sonra obyekt üzərində qalın tüstü qalxdığı qeyd olunur. Yanğınla bağlı görüntülər Ukrayna Prezidenti Volodimir Zelenski tərəfindən də ictimaiyyətə təqdim edilib.
Zelenski hücumu təsdiqləyərək bildirib ki, Ukrayna uzunmənzilli zərbə imkanlarını genişləndirir. Onun sözlərinə görə, bu cür əməliyyatlar Rusiyanın enerji gəlirlərini hədəfə alaraq ölkənin hərbi potensialını zəiflətmək məqsədi daşıyır.
Perm vilayətinin qubernatoru Dmitri Maxonin də pilotsuz uçuş aparatının sənaye obyektinə düşdüyünü və yanğın baş verdiyini təsdiqləyib, lakin əlavə detallar açıqlamayıb.
Son dövrlərdə Ukraynanın Rusiyanın daxili ərazilərinə yönəlmiş PUA hücumlarını artırması müharibənin coğrafiyasının daha da genişləndiyini göstərir.
Mənbə: EnSonHaber