Bugun.tv xəbər verir ki, Rusiya Müdafiə Nazirliyi Ukraynanı üç günlük atəşkəs müddətində 23 min 802 dəfə atəşkəsi pozmaqda ittiham edib.
Moskvanın açıqlamasına görə, Ukrayna silahlı qüvvələri pilotsuz uçuş aparatları, reaktiv yaylım atəşi sistemləri, səhra artilleriyası və minaatanlardan istifadə edərək Rusiya mövqelərinə hücumlar həyata keçirib.
Rusiya Müdafiə Nazirliyi bildirib ki, son 24 saat ərzində Ukrayna qüvvələri Rusiya mövqelərinə qarşı 12 hücum cəhdi göstərib, 768 dəfə bombardman həyata keçirib və 6 min 905 pilotsuz uçuş aparatı ilə zərbə endirib.
Açıqlamada həmçinin qeyd olunub ki, Ukrayna qüvvələri Belqorod vilayətində yerləşən mülki obyektləri 18 pilotsuz uçuş aparatı ilə hədəfə alıb. Nəticədə iki nəfərin yaralandığı bildirilib.
Rusiya tərəfi cavab olaraq Ukraynanın reaktiv yaylım atəşi sistemləri, artilleriya və minaatan mövqelərinə zərbələr endirdiyini, komanda məntəqələri və pilotsuz uçuş aparatlarının buraxılış nöqtələrinin zərərsizləşdirildiyini açıqlayıb. Rusiya hava hücumundan müdafiə sistemlərinin cəbhə xətti boyunca 85 pilotsuz uçuş aparatını vurduğu da bildirilib.
Nazirlik əlavə edib ki, Rusiya Silahlı Qüvvələri atəşkəs dövründə operativ-taktiki aviasiya, zərbə dronları və raket qüvvələri ilə hücum həyata keçirməyib.
Xatırladaq ki, tərəflər Qələbə Günü münasibətilə şənbə günündən bazar ertəsinədək qüvvədə olan üç günlük atəşkəs barədə razılığa gəlmişdilər. Lakin həm Rusiya, həm də Ukrayna qarşı tərəfi atəşkəsi pozmaqda ittiham edir.
Mənbə: İLKHA