Ukraynada enerji istehsalının kəskin azalması qarşıdakı qışda ölkənin böyük şəhərlərində ciddi problemlərə səbəb ola bilər.
TASS-ın məlumatına görə, Almaniyanın “Berliner Zeitung” qəzeti Ukraynanın enerji sistemində yaranan vəziyyətlə bağlı xəbərdarlıq edib. Qəzetin yazdığına görə, ölkənin elektrik enerjisi istehsal gücü 2022-ci ildən bəri təxminən beş dəfə azalaraq 60 GVt-dan 12 GVt-a düşüb.
Hazırda Ukraynada elektrik enerjisi çatışmazlığının təxminən 5–6 GVt olduğu bildirilir. Bu kəsirin qış aylarında iki dəfə artacağı ehtimal edilir.
Qəzet ötən qış Kiyevdə bəzi qapalı məkanlarda temperaturun mənfi 10 dərəcəyədək düşdüyünü və evlərdə buz əmələ gəldiyini qeyd edib. Ukrayna Prezidenti Vladimir Zelenski də qarşıdakı qışın ölkə üçün “çox çətin” olacağını bildirib.
TASS-ın hesablamalarına görə, Ukraynanın qaz anbarlarında hazırda təxminən 7 milyard kubmetr qaz var. Qış tələbatını qarşılamaq üçün isə təxminən 13,2 milyard kubmetr qaz tələb olunur.
Bundan başqa, ölkənin istilik sistemlərində istifadə olunan kömür ehtiyatlarının 1,2 milyon ton olduğu bildirilir. Bu ehtiyatların yalnız yay və payız dövrünü qarşılamağa kifayət etdiyi vurğulanır.
Mövcud vəziyyət enerji təminatı ilə yanaşı, qış aylarında istilik, yaşayış şəraiti və şəhər infrastrukturunun fəaliyyəti baxımından da ciddi risklər yaradır.
Mənbə: TASS