Bugun.tv xəbər verir ki, iqtisadçı deputat Vüqar Bayramov öz sosial media hesabında Bakıda keçirilən “Türk Mətbəxi Həftəsi” tədbiri barədə paylaşım edib.
Deputat bildirib ki, tədbir Türkiyə Prezidenti Rəcəb Tayyib Ərdoğanın həyat yoldaşı Əminə Ərdoğanın dəstəyi ilə keçirilən beynəlxalq “Türk Mətbəxi Həftəsi” proqramı çərçivəsində təşkil olunub.
Məlumata görə, proqram Türkiyənin Bakı Səfirliyi və Bakı Yunus Emre İnstitutu tərəfindən həyata keçirilib. Tədbirdə Türkiyənin müxtəlif bölgələrinə aid ənənəvi yeməklər təqdim olunub və iştirakçılar türk kulinariya mədəniyyəti ilə yaxından tanış olmaq imkanı əldə ediblər.
Vüqar Bayramov qeyd edib ki, hər il 21-27 may tarixlərində dünyanın müxtəlif ölkələrində keçirilən “Türk Mətbəxi Həftəsi” türk mədəniyyətinin və zəngin kulinariya irsinin beynəlxalq səviyyədə tanıdılması baxımından mühüm əhəmiyyət daşıyır.
