Mail.ru xəbər verir ki, alimlər eksperimental preparatın Alzheimer xəstəliyi zamanı beyin hüceyrələrində zədələnmiş DNT-ni bərpa etdiyini müəyyən ediblər. Araşdırma hələlik siçanlar üzərində aparılıb, lakin nəticələr gələcək müalicələr üçün ümidverici hesab olunur.
Mütəxəssislərin sözlərinə görə, Alzheimer xəstəliyi zamanı yalnız zülallar deyil, neyronların DNT-si də zədələnir. Yeni preparat hüceyrələrin təbii bərpa mexanizmlərini aktivləşdirərək DNT-dəki zədələri aradan qaldırmağa kömək edib. Bununla yanaşı, preparat beyində iltihab prosesini də zəiflədib.
Tədqiqat müəllifləri bildirirlər ki, əldə olunan nəticələr xəstəliyin səbəblərinin daha dərindən öyrənilməsi baxımından mühüm əhəmiyyət daşıyır. Onların fikrincə, gələcək klinik sınaqlar uğurlu olarsa, bu yanaşma Alzheimer xəstələrinin müalicəsində yeni imkanlar aça bilər.
Alimlər vurğulayırlar ki, preparat hələ insanlar üzərində sınaqdan keçirilməyib. Buna görə də onun təhlükəsizliyi və effektivliyi yalnız gələcək klinik araşdırmalardan sonra təsdiqlənə bilər.
Mənbə: mail.ru