Bugun.tv xəbər verir ki, yeni araşdırma gündə dörd və daha çox kofeinli içki qəbul edən insanların digər şəxslərlə müqayisədə gecə daha az yatdığını, lakin yuxularının daha dərin ola bildiyini göstərib.
Alimlər Britaniya Biobankının məlumatlarından və İsveçrənin HypnoLaus tədqiqatında iştirak edən 1 702 nəfərin yuxu göstəricilərindən istifadə ediblər. Araşdırmada səbəb-nəticə əlaqələrini qiymətləndirmək üçün genetik fərqlərdən yararlanan Mendel randomizasiyası metodundan tətbiq olunub.
Nəticələr yüksək kofein qəbulunun ümumi yuxu müddətini azaltdığını göstərib. Statistik hesablamalarda fərq 11 dəqiqədən 229 dəqiqəyədək dəyişsə də, tədqiqat müəllifləri ən yüksək göstəricilərin statistik qeyri-müəyyənlik səbəbindən real hesab edilməməli olduğunu bildiriblər. Daha etibarlı qiymətləndirməyə əsasən, yuxu müddəti gecə ərzində təxminən 11–13 dəqiqə azalır.
Maraqlıdır ki, yuxunun müddəti qısalsa da, yavaş dalğalı, dərin yuxunun intensivliyi artır. Bu göstərici delta dalğalarının fəaliyyəti ilə əlaqələndirilir. Alimlər hesab edir ki, orqanizm yuxu müddətindəki azalmanı müəyyən dərəcədə daha dərin yuxu ilə kompensasiya edə bilər.
Bununla belə, tədqiqat kofeinin yuxu üçün faydalı olduğunu sübut etmir. Müəlliflər yalnız yüksək kofein qəbulunun yuxunun quruluşunu dəyişdirdiyini və orqanizmin müəyyən uyğunlaşma mexanizmlərindən istifadə edə biləcəyini qeyd edirlər.
Mənbə: PsyPost