Bugun.tv xəbər verir ki, İsrail rəhbərliyi Qəzza zolağından uçurulan və İsrailin sərhədyanı yaşayış məntəqələrinə düşdüyü iddia edilən çərpələnglərlə bağlı sərt tədbirlərin görülə biləcəyini açıqlayıb.
İsrail Baş nazirinin ofisinin yaydığı məlumata görə, Baş nazir Binyamin Netanyahu, müdafiə naziri Yisrael Katz, Baş Qərargah rəisi Eyal Zamir və yüksək rütbəli hərbi komandirlər vəziyyəti müzakirə ediblər.
İsrail tərəfi bildirib ki, Qəzzadan uçurulan çərpələnglərin İsrail yaşayış məntəqələrinə düşməsinin qarşısı alınmasa, İsrail ordusu uçurtmaların buraxıldığı ərazilərə genişmiqyaslı hücumlar təşkil edə və həmin ərazilərdə yaşayan insanların məcburi köçürülməsinə əl ata bilər.
İsrail mətbuatı daha əvvəl Qəzzada uşaqlar tərəfindən uçurulan uçurtmaların İsrail yaşayış məntəqələrinə düşdüyünü və bunun yerli sakinlər arasında narahatlıq yaratdığını yazmışdı. İsrail ordusu isə uçurtmalarda şübhəli hər hansı elementin aşkarlanmadığını açıqlamışdı.
İsrail müdafiə naziri Yisrael Katz ordunun bu məsələdə sərt tədbirlər görməsi barədə göstəriş verdiyini bildirib.
HƏMAS isə İsrailin açıqlamalarını rədd edərək, uçurtmalarla bağlı təhdidlərin Qəzza sakinlərinə və xüsusilə uşaqlara qarşı hücumları davam etdirmək üçün bəhanə olduğunu bildirib. Təşkilatın sözçüsü Hazım Qasim beynəlxalq ictimaiyyəti İsrailə təzyiq göstərməyə çağırıb.
Mənbə: TRT Haber