Böyük Britaniyanın paytaxtı Londonda yerləşən məşhur Kovent Qarden (Covent Garden) ərazisində baş verən bıçaqlı hücum nəticəsində dörd nəfər yaralanıb.
CNN-in məlumatına görə, hadisə Endell küçəsində qeydə alınıb. Yaralanan şəxslər 34, 39, 42 və 52 yaşlı kişilərdir. Onlar hadisə yerində tibbi yardım aldıqdan sonra ağır travma mərkəzinə aparılıblar. Son məlumata əsasən, iki nəfər artıq xəstəxanadan buraxılıb, digər iki nəfərin isə vəziyyəti stabildir və xəsarətlərinin həyati təhlükə yaratmadığı bildirilib.
London Polis İdarəsi hadisə ilə əlaqədar 50 yaşlı qadının saxlanıldığını açıqlayıb. O, təhlükəli silah saxlama və hücum törətməkdə şübhəli bilinir. Hazırda polis araşdırmaları davam etdirir.
İlkin araşdırmalar hadisənin psixi sağlamlıq problemi ilə əlaqəli ola biləcəyini göstərir. Polis terror və ya təşkilatlanmış cinayət izi aşkar edilmədiyini bildirib.
Kovent Qarden Londonun ən sıx turist məkanlarından biridir. Bölgədə çoxsaylı teatrlar, restoranlar, mağazalar və məşhur Kral Opera Teatrı yerləşir.
Qeyd edək ki, Böyük Britaniyada bıçaqlı cinayətlər son illərin əsas təhlükəsizlik problemlərindən biri olaraq qalır. Rəsmi statistikaya görə, 2026-cı ilin mart ayına qədər olan 12 ay ərzində İngiltərə və Uelsdə 48 mindən çox bıçaqlı cinayət qeydə alınıb.
Mənbə: CNN