Qidalanma üzrə mütəxəssislər səhər yeməyində istifadə edilən bəzi məhsulların gün ərzində enerji səviyyəsini qorumaqda mühüm rol oynadığını açıqlayıb. Health portalına istinadən yayılan məlumatda bildirilir ki, əsas qayda zülal, lif və faydalı yağların balanslı şəkildə qəbul edilməsidir.
Mütəxəssislərin siyahısına daxil edilən məhsullar arasında yumurta, yulaf, yunan yoqurtu, qoz-fındıq, çia toxumları və giləmeyvələr yer alır. Bu qidalar uzunmüddətli toxluq hissi yaradır, qan şəkərinin kəskin dəyişməsinin qarşısını alır və enerji səviyyəsini stabil saxlayır.
Bundan əlavə, siyahıda daha az gözlənilən məhsullar da var. Məsələn, mərcimək və şirin kartof kimi qidalar yavaş həzm olunan karbohidratlarla zəngindir və gün ərzində enerji “düşüşlərinin” qarşısını alır. Eyni zamanda ispanaq və somon balığı vitaminlər və omeqa-3 yağ turşuları ilə zəngin olduğu üçün beyin funksiyalarını dəstəkləyir.
Mütəxəssislər vurğulayır ki, ən ideal səhər yeməyi tək bir məhsuldan deyil, onların düzgün kombinasiyasından ibarət olmalıdır. Məsələn, tərəvəzlə birlikdə yumurta və ya qoz-fındıq və giləmeyvə ilə yulaf sıyığı daha uzun müddət enerji və diqqəti qorumağa kömək edir.
Mənbə: mail.ru