Bugun.tv xəbər verir ki, rusiyalı həkim bəzi qida məhsullarının uzunmüddətli və həddindən artıq istifadəsinin immun sistemini zəiflədə və xərçəng riskini artıra biləcəyini bildirib.
Mütəxəssisin sözlərinə görə, tərkibində çoxlu şəkər, trans yağlar və yüksək dərəcədə emal olunmuş əlavələr olan məhsullar orqanizmdə xroniki iltihabın yaranmasına səbəb olur. Bu isə immun hüceyrələrinin fəaliyyətini zəiflədərək orqanizmin xəstəliklərə qarşı müqavimətini azalda bilər.
Həkim xüsusilə şirin qazlı içkilər, sənaye üsulu ilə hazırlanan şirniyyatlar, kolbasa və sosiska kimi emal olunmuş ət məhsulları, fast-food, çips və digər qəlyanaltıların müntəzəm istifadəsinin sağlamlıq üçün təhlükəli olduğunu vurğulayıb. Onun sözlərinə görə, bu məhsulların tez-tez qəbul edilməsi piylənmə, şəkərli diabet, ürək-damar xəstəlikləri ilə yanaşı, bəzi xərçəng növlərinin inkişaf riskini də artıra bilər.
Mütəxəssis sağlam qidalanmanın əsasını təzə tərəvəz və meyvələr, tam taxıllar, paxlalılar, balıq, keyfiyyətli zülal mənbələri və bitki yağlarının təşkil etməsinin vacibliyini qeyd edib. O bildirib ki, balanslı qidalanma, kifayət qədər fiziki aktivlik və sağlam həyat tərzi immun sisteminin normal fəaliyyətini qorumağa kömək edir və bir çox xəstəliklərin qarşısının alınmasında mühüm rol oynayır.
Mənbə: mail.ru