Bugun.tv xəbər verir ki, bir çox insan zəngli saat çalmamışdan bir neçə dəqiqə əvvəl öz-özünə oyanır. Bu hal təsadüfi görünsə də, əslində orqanizmin daxili bioloji saatı ilə əlaqəli ola bilər.
Mail.ru yazır ki, insan orqanizmində yuxu və oyaqlıq dövrlərini tənzimləyən daxili ritm mövcuddur. İnsan hər gün təxminən eyni saatda yatıb qalxırsa, bədən müəyyən müddətdən sonra bu rejimə uyğunlaşa bilir. Nəticədə səhər oyanmağa yaxın orqanizmdə yuxudan oyanmağa hazırlıq prosesləri başlayır.
Bu zaman bəzi hormonların səviyyəsində dəyişiklik baş verir, bədən temperaturu tədricən yüksəlir və beyin oyanmağa hazırlaşır. Buna görə də insan zəngli saatın çalmasına az qalmış gözlərini aça bilər.
Mütəxəssislərin fikrincə, xüsusilə sabit yuxu rejimi olan insanlarda bu hal daha çox müşahidə edilir. Hər gün eyni saatda yatmaq və qalxmaq beynin həmin vaxtı “öyrənməsinə” kömək edir.
Lakin zəngli saatdan əvvəl oyanmaq həmişə yaxşı yuxunun göstəricisi deyil. Əgər insan gecə ərzində dəfələrlə oyanırsa, çox erkən yuxudan ayılırsa və gün ərzində yorğunluq hiss edirsə, bunun səbəbi yuxu rejiminin pozulması, stress və digər amillərlə bağlı ola bilər.
Yuxu keyfiyyətini qorumaq üçün hər gün mümkün qədər eyni vaxtda yatmaq və oyanmaq, axşam saatlarında ekran qarşısında uzun müddət qalmamaq və kifayət qədər yuxu almaq tövsiyə olunur.
Mənbə: mail.ru