Bugun.tv– xəbər verir ki, İspaniyanın Migel Ernandes Universiteti alimləri damar sağlamlığını yaxşılaşdırmaq üçün ən təsirli məşq növünü müəyyən ediblər.
Yüksək intensivlikli interval məşqləri (qısa olaraq HIIT) ürək-damar xəstəlikləri olan insanlarda damar funksiyasını ən effektiv şəkildə yaxşılaşdıran məşq kimi qiymətləndirilib.
Tədqiqatın nəticələri European Journal of Preventive Cardiology jurnalında dərc olunub. Araşdırmaya 6818 pasiyent daxil edilib və müxtəlif məşq növləri müqayisə edilib: orta intensivlikli kardio, güc məşqləri, qarışıq proqramlar və HIIT – (High-Intensity Interval Training).
Nəticələr göstərib ki, bütün fiziki aktivlik formaları damarların daxili qatının — endotel funksiyasını yaxşılaşdırır. Lakin HIIT bu baxımdan ən güclü təsiri göstərib.
Mütəxəssislərin sözlərinə görə, yüksək intensivlikli interval məşqləri qısa müddətli maksimum yüklənmə ilə bərpa fazasının növbələşməsinə əsaslanır. Bu proses qan axınını gücləndirir və damarların genişlənməsini təmin edən azot oksidinin ifrazını artırır.
Alimlər bildirirlər ki, bu tip məşqlər damar elastikliyini artırır və ürək-damar sisteminin ümumi vəziyyətini yaxşılaşdırır. Qarışıq (kardio + güc) proqramların isə bəzi hallarda daha güclü təsir göstərə biləcəyi qeyd olunub, lakin bunun üçün əlavə tədqiqatlara ehtiyac var.
Mənbə: mail.ru