Bugun.tv xəbər verir ki, payızın gəlişi ilə bir çox insan daha çox yemək istədiyini və xüsusilə isti, şirin və yağlı qidalara meylin artdığını hiss edir. “Gazeta.Ru”ya bu vəziyyətin səbəblərini psixologiya üzrə fəlsəfə doktoru, RTU MİREA-nın Humanitar və sosial elmlər kafedrasının dosenti Yelena Şpahina açıqlayıb.
Mütəxəssisin sözlərinə görə, əsas səbəblərdən biri havaların soyumasıdır. Payızda hava daha soyuq və rütubətli olur, isti yemək və içkilər isə insana rahatlıq və istilik hissi verir. Çay, şorba və isti yeməklər yalnız qida kimi deyil, həm də özünə qayğı ilə əlaqələndirilir.
Psixoloq ikinci səbəb kimi sakitləşmə ehtiyacını göstərib. Günlərin qısalması, havanın tez-tez dəyişməsi və planların pozulması bəzi insanlarda narahatlıq yarada bilər. Bu zaman şirin və yağlı qidalar qısa müddətlik xoş hiss yaradaraq gərginliyi azaltmağa kömək edir.
Digər amil isə payızda yaranan qida vərdişləridir. Məsələn, müəyyən vaxtda çay içmək, axşam dadlı nəsə almaq və ya həftəsonları xüsusi yeməklər hazırlamaq insanda sabitlik hissi yarada bilər.
Mütəxəssis həmçinin günəş işığının və parlaq rənglərin azalmasının da qidaya marağı artırdığını bildirib. Onun fikrincə, istilik və rahatlıq hissini yalnız yeməkdən deyil, ünsiyyətdən, gəzintidən və sevilən məşğuliyyətlərdən də almaq mümkündür.
Mənbə: Mail.ru