Alimlər məşhur pu-er çayının tərkibində bağırsaq sağlamlığı üçün mühüm faydaları olan maddə müəyyən ediblər. Araşdırmaya görə, bu çayın fermentasiya prosesində yaranan teabraunin birləşməsi bağırsaqları iltihabdan qorumağa və onun müdafiə funksiyalarını bərpa etməyə kömək edir.
Zhejiang Universiteti tədqiqatçıları tərəfindən aparılan araşdırmanın nəticələri Food & Function jurnalında dərc olunub. Bildirilir ki, teabraunin pu-er çayının uzunmüddətli mikrobioloji fermentasiyası zamanı yaranan bioaktiv birləşmədir.
Təcrübələr zamanı bağırsağın xroniki iltihabi xəstəliyi olan xoralı kolit modeli yaradılmış siçanlar üzərində aparılan testlər göstərib ki, teabraunin selikli qişanın zədələnməsini azaldır, çəki itkisinin qarşısını alır və ümumi vəziyyəti yaxşılaşdırır.
Alimlər bu təsiri bağırsağın baryer funksiyasının bərpası ilə əlaqələndirirlər. Belə ki, teabraunin bağırsaq divarında qoruyucu qat yaradan selik ifraz edən hüceyrələri aktivləşdirir və bununla da patogenlərin və toksinlərin orqanizmə daxil olmasının qarşısını alır.
Bundan əlavə, maddənin bağırsaq mikrobiotasına da müsbət təsir göstərdiyi müəyyən edilib. Araşdırma nəticəsində faydalı bakteriyaların sayının artdığı, iltihabla əlaqəli mikroorqanizmlərin isə azaldığı müşahidə olunub.
Tədqiqatçılar hesab edirlər ki, teabraunin gələcəkdə funksional qidalanmada perspektivli komponent kimi istifadə oluna bilər. Lakin araşdırma hələ klinik mərhələyə çatmadığı üçün bu təsirlərin insan orqanizmində tam təsdiqi üçün əlavə tədqiqatlara ehtiyac var.
Mənbə: mail.ru