Texnologiya nəhəngi Google ölümcül virusların yayılmasının qarşısını almaq məqsədilə ABŞ-ın Kaliforniya və Florida ştatlarında 32 milyon xüsusi yetişdirilmiş ağcaqanadın təbiətə buraxılması üçün federal qurumlara müraciət edib.
Layihə çərçivəsində Qərbi Nil virusu, Zika, Denq qızdırması, Sarı qızdırma və Sent-Luis ensefaliti kimi xəstəlikləri yayan ağcaqanadların sayının azaldılması hədəflənir.
Mütəxəssislərin sözlərinə görə, laboratoriyada yetişdirilən erkək ağcaqanadlar təbii şəkildə mövcud olan “Wolbachia” bakteriyası ilə yoluxdurulur. Bu ağcaqanadlar vəhşi dişi ağcaqanadlarla cütləşdikdə yumurtalar inkişaf edə bilmir və nəticədə zərərverici populyasiya zamanla azalır.
Layihənin tərəfdarları bunu kimyəvi dərmanlamaya alternativ ekoloji üsul hesab etsələr də, bəzi sakinlər milyonlarla laboratoriya mənşəli ağcaqanadın ətraf mühitə buraxılmasının mümkün risklərindən narahat olduqlarını bildirirlər.
Məlumata görə, ağcaqanadların istehsalı, cinsiyyətlərinə görə ayrılması və buraxılması prosesində süni intellekt və robot texnologiyalarından istifadə olunur.
ABŞ-ın Ətraf Mühitin Mühafizəsi Agentliyi layihə ilə bağlı ictimai rəyləri iyunun 5-dək qəbul edəcək. Bundan sonra proqramın həyata keçirilib-keçirilməməsinə dair yekun qərar veriləcək.
Mənbə: TrtHaber