Bugun.tv xəbər verir ki, Yaponiyada Tokio şəhərinin mümkün fəlakət zamanı inzibati funksiyalarını öz üzərinə götürəcək “ikinci paytaxt”ın müəyyənləşdirilməsini nəzərdə tutan qanunun qəbulundan sonra bölgələr arasında rəqabət güclənib.
Yeni qanun iyulun 24-də parlament tərəfindən qəbul edilib və oktyabrın sonunda qüvvəyə minəcək. Qanuna əsasən, əhali və iqtisadi göstəricilərlə bağlı müəyyən tələblərə cavab verən bölgələrin müraciəti əsasında baş nazir bir və ya bir neçə ehtiyat inzibati mərkəz müəyyən edə biləcək. Seçiləcək mərkəzlərə vergi güzəştlərinin tətbiqi nəzərdə tutulur.
Lakin ekspertlər prosesin meyarlarının kifayət qədər aydın olmadığını bildirirlər. Onların fikrincə, bu vəziyyət siyasi razılaşmaların seçimə təsir göstərməsi riskini artırır.
Kyodo agentliyinə danışan mütəxəssislər qanunun xüsusilə Osaka şəhərinə üstünlük vermək məqsədi ilə sürətlə qəbul edildiyi barədə tənqidləri də gündəmə gətiriblər. Osaka uzun müddətdir “ikinci paytaxt” ideyasını irəli sürən əsas namizədlərdən biridir.
Bununla yanaşı, Fukuoka, Hokkaydo və Hiroşima kimi bölgələr də namizədliyə maraq göstərir. Aichi sənaye potensialını, Qunma isə təbii fəlakət riskinin nisbətən aşağı olmasını və Tokioya nəqliyyat əlçatanlığını önə çəkir.
Ekspertlər bildirirlər ki, fövqəladə hallarda Tokionun inzibati funksiyalarını əvəz edəcək mərkəzlə iqtisadi artımın əsas dayağı olacaq sənaye mərkəzinin tələbləri eyni deyil. Onların fikrincə, seçim meyarları dəqiq müəyyənləşdirilməsə, layihə regional bərabərsizliyi azaltmaq əvəzinə daha da dərinləşdirə bilər.
Mənbə: En Son Haber