Bugun.tv xəbər verir ki, Almaniyanın Ştutqart şəhərində tikilən yeni yeraltı dəmir yolu stansiyası kondisionerdən istifadə etmədən sərin saxlanılacaq. Euronews-un 27 avqust tarixli məlumatına görə, “Stuttgart 21” layihəsi çərçivəsində inşa edilən nəhəng nəqliyyat qovşağında temperaturun yeraltı quruluş və xüsusi memarlıq həlləri hesabına sabit saxlanılması planlaşdırılır.
Layihə xüsusilə diqqət çəkir, çünki Almaniya bu yay rekord istilərlə üzləşib. Şəhər sakinlərinin bir hissəsi yeni stansiyanın kondisionersiz layihələndirilməsini şübhə ilə qarşılayıb.
Dəmir yolu operatoru Deutsche Bahn bildirir ki, stansiyanın yeraltında yerləşməsi temperaturun həm isti, həm də soyuq havalarda müəyyən həddə sabit qalmasına imkan verəcək. Layihədə təbii havalandırma və xüsusi konstruktiv həllərdən istifadə olunması nəzərdə tutulur.
“Stuttgart 21” layihəsinin tarixi də kifayət qədər uzundur. Layihə hələ 1980-ci illərin sonlarında hazırlanıb, ictimaiyyətə 1994-cü ildə təqdim edilib və tikintiyə 2010-cu ildə başlanılıb.
Stansiyanın yeni iqlim şəraitində nə qədər səmərəli işləyəcəyi isə istifadəyə verildikdən sonra məlum olacaq.
Mənbə: Euronews