Bugun.tv xəbər verir ki, cəmi bir gecə yuxusuz qalmaq belə beynin fəaliyyətinə və ümumi sağlamlığa mənfi təsir göstərə bilər. Bu barədə terapevt Olqa Suxareva məlumat verib.
Həkimin sözlərinə görə, gecə yuxusu zamanı beyində qlimfatik sistem aktivləşir. Bu sistem onurğa-beyin mayesi vasitəsilə beyin toxumalarında toplanan maddələr mübadiləsi məhsullarını xaric edir və sinir sisteminin normal fəaliyyətini dəstəkləyir.
Mütəxəssis bildirib ki, həmin maddələrdən biri də beta-amiloid zülalıdır. Alimlər bu zülalın beyində həddindən artıq toplanmasını Altsheymer xəstəliyinin inkişaf riski ilə əlaqələndirirlər. Eksperimental araşdırmalar göstərib ki, cəmi bir gecə yuxusuz qalmaq belə beyində beta-amiloidin səviyyəsini müvəqqəti artıra və diqqət, yaddaş, qərarvermə kimi koqnitiv funksiyaların zəifləməsinə səbəb ola bilər.
Olqa Suxareva vurğulayıb ki, uzun müddət ərzində sutkada yeddi saatdan az yatmaq yalnız beyin fəaliyyətinə deyil, həm də ümumi sağlamlığa mənfi təsir göstərir. Bu vərdiş sinir sistemi pozğunluqları, diqqət dağınıqlığı və müxtəlif xroniki xəstəliklərin yaranma riskini artırır.
Həkim sağlam həyat tərzi üçün hər gecə kifayət qədər və keyfiyyətli yuxunun vacibliyini xatırladaraq, yuxu rejiminə riayət etməyi tövsiyə edib.
Mənbə: mail.ru