Bugun.tv xəbər verir ki, İngiltərənin Şərqi İngiltərə Universitetinin (UEA) alimləri ürəyin təqvim yaşından fərqli olaraq, onun funksional yaşını müəyyənləşdirməyə imkan verən yeni üsul hazırlayıblar. Bu üsul ürək-damar problemlərinin əlamətlər ortaya çıxmazdan əvvəl aşkarlanmasına kömək edə bilər.
Tədqiqatda 558 nəfərin ürəyinin maqnit-rezonans tomoqrafiyası (MRT) məlumatları araşdırılıb. Alimlər ürəyin quruluş və fəaliyyət göstəricilərindən, xüsusilə ürəyin sol qulaqcığının ölçüsü və qanı nə dərəcədə effektiv xaric etməsindən istifadə edərək funksional yaşın hesablanması üçün model hazırlayıblar.
Nəticələr göstərib ki, sağlam insanların ürəyinin funksional yaşı onların real yaşına çox yaxın olur. Lakin yüksək qan təzyiqi, şəkərli diabet, ürək ritminin pozulması və piylənmə kimi problemləri olan insanlarda ürəyin funksional yaşı daha yüksək müəyyən edilib. Müqayisə qrupunda bu fərq orta hesabla 4,6 il olub.
Tədqiqat müəllifləri hesab edirlər ki, bu yanaşma ürəyin vəziyyətindəki dəyişiklikləri daha erkən aşkar etməyə və insanları həyat tərzində dəyişikliklər etməyə təşviq edə bilər.
Mənbə: Health Mail