Bugun.tv xəbər verir ki, avstraliyalı mütəxəssislər xarab olmağa başlayan ərzaqların hansı hallarda istifadə edilə biləcəyini, hansı hallarda isə sağlamlıq üçün təhlükə yaratdığını açıqlayıblar.
The Conversation portalında dərc olunan məlumata görə, məhsulun üzərində kif əmələ gəlməsi, selikli qat yaranması, maye ifraz etməsi və ya kəskin xoşagəlməz qoxu verməsi onun atılmalı olduğunu göstərən əsas əlamətlərdir. Ekspertlər bildirirlər ki, bu dəyişikliklər təhlükəli mikroorqanizmlərin çoxalmasından xəbər verə bilər.
Bununla belə, bəzi məhsulların büzüşməsi, qaralması və ya quruması onların istifadəyə yararsız olduğu anlamına gəlmir. Məsələn, qaralmış bananlar, büzüşmüş almalar və qurumuş sitrus qabıqları müxtəlif yeməklərin və şirniyyatların hazırlanmasında istifadə oluna bilər.
Mütəxəssislər qeyd edirlər ki, alma və armud kimi bərk meyvələrdə yaranan kif zədələnmiş hissə geniş şəkildə kəsilərək təmizlənə bilər. Lakin yumşaq giləmeyvələrdə kif aşkar edildikdə məhsul tamamilə atılmalıdır.
Kartof, kök və balqabaq kimi tərəvəzlər bir qədər solduqda belə istifadəyə yararlı qala bilər. Ancaq yaşıllaşmış və çox cücərmiş kartoflarda sağlamlıq üçün zərərli olan solanin maddəsinin miqdarı artır.
Çörəklə bağlı isə mütəxəssislər daha sərt mövqe sərgiləyirlər. Çörəyin məsaməli quruluşuna görə kif bütün məhsula yayıla bildiyindən kiflənmiş çörək tamamilə atılmalıdır. Kif olmayan, sadəcə bərkiyən çörək isə suxarı və ya çörək qırıntısı hazırlamaq üçün istifadə edilə bilər.
Süd məhsullarına gəldikdə, yumşaq pendirlərdə kif yaranarsa, məhsulun tamamilə atılması tövsiyə olunur. Sərt pendirlərdə isə kiflənmiş hissə ehtiyatla kəsilərək qalan hissə istifadə edilə bilər.
Mənbə: mail.ru