Pomidorun tərkibində olan likopin maddəsi ürək-damar sisteminin sağlamlığını dəstəkləyə və bir sıra ürək xəstəliklərinin riskini azalda bilər.
Bugun.tv xəbər verir ki, bu nəticəyə Polşanın Poznan Kənd Təsərrüfatı Elmləri Universitetinin alimləri gəliblər.
Nutrients jurnalında dərc olunan elmi icmalda bildirilib ki, pomidorun faydalı təsiri onun tərkibindəki karotinoidlər, polifenollar, vitaminlər və minerallarla bağlıdır. Alimlər xüsusilə pomidora qırmızı rəng verən güclü antioksidant likopinə diqqət yetiriblər.
Araşdırmaya görə, likopin iltihabı və oksidləşdirici stresi azaltmağa, hüceyrələri zədələnmədən qorumağa və qan damarlarının elastikliyini artırmağa kömək edir. Bu xüsusiyyətlər hipertoniya, ateroskleroz və digər ürək-damar xəstəliklərinin qarşısının alınmasında mühüm rol oynaya bilər.
Tədqiqatçılar qeyd ediblər ki, faydalı maddələr yalnız təzə pomidorda deyil, həm də pomidor şirəsi, sous, püresi və konserv məhsullarında qorunub saxlanılır. Bəzi hallarda istilik emalı likopinin orqanizm tərəfindən mənimsənilməsini daha da yaxşılaşdırır.
Mütəxəssislərin sözlərinə görə, pomidordakı faydalı maddələrin miqdarı sortdan, yetişmə dərəcəsindən, becərilmə şəraitindən və hazırlanma üsulundan asılıdır. Tam yetişmiş pomidorlarda likopinin səviyyəsi daha yüksək olur.
Araşdırmada pomidorun tərkibindəki oksalatlar və oksalat turşusu da qiymətləndirilib. Alimlər bildiriblər ki, bu maddələr bəzi qida komponentlərinin mənimsənilməsini azalda bilsə də, pomidorun normal miqdarda istehlakı zamanı onların insan sağlamlığına mənfi təsiri əhəmiyyətsiz hesab olunur.
Mənbə: mail.ru