Bugun.tv xəbər verir ki, xroniki yuxusuzluq həddindən artıq qidalanma olmasa belə, qarın nahiyəsində piylənməyə səbəb ola bilər. Bu barədə endokrinoloq Nelli Markuşina məlumat verib.
Mütəxəssisin sözlərinə görə, yuxu çatışmazlığı zamanı orqanizmdə stress hormonu olan kortizolun səviyyəsi yüksəlir. Bu isə daxili orqanların ətrafında toplanan və sağlamlıq üçün daha təhlükəli hesab edilən visseral piyin artmasına şərait yaradır. Belə piylənmə 2-ci tip şəkərli diabet, ürək-damar xəstəlikləri və maddələr mübadiləsinin pozulması riskini artırır.
Həkim qeyd edib ki, yuxusuzluq iştahı tənzimləyən hormonların fəaliyyətini də pozur. Toxluq hissi yaradan leptinin səviyyəsi azalır, aclıq hissini artıran qrelin isə yüksəlir. Nəticədə insan daha tez-tez yemək istəyir və xüsusilə şirin, yağlı qidalara meyl göstərir.
Bundan əlavə, kifayət qədər yatmamaq orqanizmin insulinə həssaslığını azaldır ki, bu da zamanla insulin müqavimətinin və qarın piylənməsinin yaranmasına səbəb ola bilər. Yuxusuzluq həmçinin fiziki aktivliyi azaldır və maye toplanmasını artıraraq qarının daha böyük görünməsinə gətirib çıxara bilər.
Endokrinoloq böyüklərə gündə 7–9 saat yatmağı tövsiyə edib. Onun sözlərinə görə, davamlı yuxusuzluq zamanı yalnız pəhriz və idmanla çəkiyə nəzarət etmək daha çətin olur.
Mənbə: mail.ru