Uzun bayram tətilindən sonra yuxu rejiminin pozulması bir çox insan üçün aktual problemə çevrilib. Gec yatmaq, səhər isə çətinliklə oyanmaq iş rejiminə qayıdışı daha da çətinləşdirir. Nevroloq Nina Koptenko yuxu rejimini tədricən bərpa etməyin effektiv yollarını açıqlayıb.
Mütəxəssisin sözlərinə görə, yuxu rejimini qəfil dəyişmək əvəzinə, orqanizmi mərhələli şəkildə uyğunlaşdırmaq daha faydalıdır.
Yuxu rejimini bərpa etməyin 7 əsas yolu
1. Hər gün daha tez yatmağa çalışın
Əgər gecə saatlarında yatmağa öyrəşmisinizsə, birdən-birə erkən yatmaq çətin olacaq. Hər axşam yatma vaxtını 15–30 dəqiqə irəli çəkmək orqanizmin uyğunlaşmasını asanlaşdırır.
2. Hər gün eyni saatda oyanın
Yuxu rejiminin tənzimlənməsində əsas rol oyanma saatına məxsusdur. Həftəsonları da daxil olmaqla, hər gün eyni vaxtda (maksimum 30 dəqiqə fərqlə) oyanmaq tövsiyə olunur.
3. Səhər işıq, axşam isə qaranlıq yaradın
Səhər tezdən gün işığına çıxmaq və ya pəncərə kənarında vaxt keçirmək bioloji saatı aktivləşdirir. Yatmazdan 1–2 saat əvvəl isə işığı azaltmaq və elektron cihazlardan uzaq durmaq lazımdır.
4. Axşam rahatladıcı ritual formalaşdırın
Yatmazdan əvvəl isti duş, kitab oxumaq, sakit musiqi dinləmək və ya yüngül dartınma hərəkətləri sinir sistemini istirahətə hazırlayır.
5. Yuxu gəlmirsə, yataqdan qalxın
Uzun müddət yataqda oyaq qalmaq tövsiyə edilmir. Başqa otağa keçib zəif işıqda sakit fəaliyyətlə məşğul olmaq daha effektivdir.
6. Axşam alkoqol və ağır qidalardan uzaq durun
Alkoqol yuxuya getməni asanlaşdıra bilər, lakin yuxunun keyfiyyətini pozur. Eyni zamanda axşam saatlarında kofein və ağır yeməklərdən çəkinmək lazımdır.
7. Melatonini həkim məsləhəti olmadan qəbul etməyin
Melatonin hormonal preparatdır və yalnız xüsusi hallarda təyin olunur. Özbaşına qəbulu yuxu balansını daha da poza bilər.
Mütəxəssislər bildirir ki, bir-iki gecəlik yuxusuzluq panikaya səbəb olmamalıdır. Lakin yuxuya getmə çətinliyi, gecə tez-tez oyanma və gündüz yorğunluq bir neçə həftə davam edərsə, somnoloqa müraciət etmək vacibdir.
Mənbə: mail.ru