Bugun.tv xəbər verir ki, alimlər uzun müddət oturaq həyat tərzi keçirən insanların sağlamlıq risklərini azaltmaq üçün gündə 9-10 min addım atmasının faydalı olduğunu müəyyən ediblər.
Araşdırmalara görə, gün ərzində 9-10 min addım atan şəxslərdə ürək-damar xəstəlikləri riski 21 faiz, erkən ölüm riski isə 39 faiz azalır. Mütəxəssislər bildirirlər ki, gündə 4-4,5 min addım belə sağlamlıq üçün mümkün faydanın təxminən yarısını təmin edə bilər.
Tədqiqat çərçivəsində 72 mindən çox insanın məlumatları təhlil edilib. İştirakçıların orta hesabla gündə 10,6 saat oturaq vəziyyətdə qaldığı müəyyən olunub. Alimlər hesab edirlər ki, fiziki aktivliyin artırılması uzun müddət hərəkətsiz qalmanın mənfi təsirlərini qismən kompensasiya edə bilər.
Bununla belə, ekspertlər qeyd edirlər ki, gəzinti oturaq həyat tərzinin bütün zərərlərini tam aradan qaldırmır və gün ərzində mütəmadi hərəkət etmək, fasilələrlə ayağa qalxmaq da vacibdir. Tədqiqatın nəticələri insanların gündəlik addım sayını artırmasının sağlam həyat tərzinin mühüm elementi olduğunu bir daha təsdiqləyib.
Mənbə: Health Mail.ru