Psixoloqlar insanlara “yox” deməyi öyrənməyin emosional sağlamlıq və şəxsi sərhədlərin qorunması baxımından vacib olduğunu bildiriblər. Mütəxəssislərin sözlərinə görə, hər müraciətə razılaşmaq vərdişi emosional tükənməyə və daxili gərginliyə səbəb ola bilər.
Psixoloq Mila Şerbakova “üç saniyə qaydası” adlı məşqi tövsiyə edir. Bu üsula əsasən, insana müraciət edildikdə dərhal cavab vermək əvəzinə qısa fasilə vermək, nəfəs alıb-vermək və yalnız üçüncü saniyədə cavab vermək məsləhət görülür.
Mütəxəssislər bildirir ki, insanların “yox” deməkdə ən böyük çətinliyi münasibətləri korlamaq qorxusudur. Lakin davamlı güzəştlər uzun müddətdə yorğunluq və narazılıq yaradır.
Psixoloqlar həmçinin “sendviç-inkar” üsulunu da tövsiyə edirlər: əvvəl anlayış ifadə etmək, sonra imtinanı bildirmək, sonda isə alternativ təklif vermək.
Digər bir üsul isə “qırmızı xətt” texnikasıdır. Bu yanaşmada insan əvvəlcədən hansı hallarda qəti şəkildə “yox” deyəcəyini müəyyən edir və bu sərhədlər qərar verməyi asanlaşdırır.
Mütəxəssislər qeyd edirlər ki, şəxsi sərhədlərin düzgün müəyyən edilməsi stressi azaldır və daha sağlam ünsiyyət qurmağa kömək edir.
Mənbə: mail.ru