Bugun.tv xəbər verir ki, alimlər keyfiyyətli və müntəzəm yuxunun insan ömrünün uzunluğuna mühüm təsir göstərdiyini müəyyən ediblər.
Araşdırmaya görə, gecə ərzində kifayət qədər və dərin yuxu alan insanlarda ürək-damar xəstəlikləri, şəkərli diabet və digər xroniki xəstəliklərin yaranma riski daha aşağı olur. Mütəxəssislər bildirirlər ki, yuxu zamanı orqanizmdə hüceyrələrin bərpası, immun sisteminin güclənməsi və beynin informasiya emalı prosesləri aktiv şəkildə davam edir.
Tədqiqat müəlliflərinin sözlərinə görə, hər gün eyni vaxtda yatmaq və oyanmaq, gecə yuxusunun 7-9 saat olması, həmçinin yatmazdan əvvəl telefon və digər elektron cihazlardan istifadənin məhdudlaşdırılması sağlam yaşlanmaya kömək edir.
Alimlər vurğulayırlar ki, yuxu rejiminin pozulması orqanizmdə iltihabi prosesləri artırır, stress hormonlarının səviyyəsini yüksəldir və vaxtından əvvəl qocalmanı sürətləndirə bilər.
Mütəxəssislər sağlam həyat tərzinin vacib elementlərindən biri kimi düzgün yuxu rejiminə riayət etməyi tövsiyə edirlər.
Mənbə: Mail.ru Health