Bugun.tv xəbər verir ki, dietoloq Sara Şenker ürək sağlamlığını qorumaq və xolesterin səviyyəsinə nəzarət etmək üçün gündəlik qoz istehlakını tövsiyə edib.
Mütəxəssisin sözlərinə görə, qoz omeqa-3 yağ turşuları ilə zəngindir və bu maddələr ürək-damar sistemi, beyin fəaliyyəti və damarların sağlamlığı üçün faydalıdır. O bildirib ki, qozun doymuş yağlarla zəngin qidaların əvəzinə istehlak edilməsi daha sağlam seçim hesab olunur.
Sara Şenker qeyd edib ki, bəzi araşdırmalar gündə təxminən 30 qram qoz qəbul edən insanlarda “pis” xolesterin (LDL) səviyyəsinin müəyyən qədər azaldığını göstərir. Onun sözlərinə görə, bu təsir ümumi qidalanma ideal olmasa belə müşahidə edilə bilər.
Dietoloq əlavə edib ki, 30 qram qoz təxminən 200 kilokalori təşkil etsə də, toxluq hissini artırdığı üçün gün ərzində ümumi kalori qəbulunun azalmasına kömək edə bilər. Bununla belə, o vurğulayıb ki, qoz sağlam qidalanma rejiminin bir hissəsi kimi qəbul edilməlidir və yüksək xolesterin problemi olan şəxslər mütləq həkim məsləhətinə əməl etməlidirlər.
Mənbə: mail.ru