Bugun.tv xəbər verir ki, alimlər müəyyən ediblər ki, arıqlamaq üçün mütləq hər gün idman zalına getmək lazım deyil. Yeni araşdırmaya görə, həftəlik fiziki aktivliyin ümumi müddəti qorunduğu halda, məşqləri daha az sayda, lakin daha intensiv sessiyalar şəklində etmək də oxşar nəticə verə bilər.
Tədqiqatda qarın piylənməsindən əziyyət çəkən yüzlərlə könüllü iştirak edib. Onlar müxtəlif qruplara bölünüb: bir qrup həftədə bir dəfə 70 dəqiqəlik intensiv interval məşqi edib, digər qrup isə eyni müddəti həftədə üç məşqə bölüb. Təxminən dörd ay davam edən müşahidələr göstərib ki, hər iki qrupda bədən piyinin azalması, bel çevrəsinin kiçilməsi və ürək-damar sağlamlığının yaxşılaşması baxımından nəticələr demək olar eyni olub.
Tədqiqat müəllifləri bildirirlər ki, vaxt çatışmazlığı səbəbindən hər gün idman edə bilməyən insanlar üçün həftədə bir və ya iki dəfə yüksək intensivlikli məşq praktik alternativ ola bilər. Bununla belə, mütəxəssislər vurğulayırlar ki, arıqlamada sağlam qidalanma və ümumi həyat tərzi hələ də əsas rol oynayır.
Mənbə: mail.ru