Bugun.tv xəbər verir ki, dərin yuxu zamanı beyində baş verən dəyişikliklər insanın stres və narahatlıqla daha yaxşı mübarizə aparmasına kömək edə bilər. Yeni araşdırma göstərib ki, yavaş dalğalı yuxu zamanı beynin müəyyən bölgəsində neyronların fəaliyyəti yenidən təşkil olunur.
JNeurosci jurnalında dərc edilən tədqiqatı Morehouse Tibb Məktəbinin alimləri aparıblar. Tədqiqat zamanı siçanların dərin yuxu mərhələsində beynində baş verən proseslərin onların stresli sosial vəziyyətlərə reaksiyasına necə təsir etdiyi araşdırılıb.
Alimlər beynin emosiyalara və müxtəlif vəziyyətlərə reaksiyanın formalaşmasında iştirak edən prelimbik korteks adlı sahəsinə diqqət yetiriblər. Müşahidələr göstərib ki, dərin yuxu zamanı beyin dalğaları yavaşladıqda bu bölgədəki neyronların fəaliyyəti də azalır.
Tədqiqatçılar bu “sakitləşmənin” sağlam yuxunun mühüm əlamətlərindən biri olduğunu bildirirlər. Onların fikrincə, dərin yuxu keçirən və stresə daha davamlı olan heyvanlarda daha sonra neyronların fəaliyyəti dəyişir. Bu dəyişiklik beynin stres və narahatlıqla daha yaxşı mübarizə aparmasına uyğunlaşması ilə əlaqələndirilir.
Alimlərin qənaətinə görə, yuxunun keyfiyyəti emosiyaların idarə olunmasına birbaşa təsir göstərə bilər. Dərin yuxu zamanı beynin stres reaksiyasına nəzarət edən mexanizmlərinin daha səmərəli işlədiyi ehtimal olunur.
Tədqiqat siçanlar üzərində aparılıb və nəticələrin insanlar üçün tam şəkildə təsdiqlənməsi üçün əlavə araşdırmalara ehtiyac var. Bununla belə, alimlər yuxunun psixoloji dayanıqlılığın formalaşmasında mühüm rol oynaya biləcəyini düşünürlər.
Mənbə: mail.ru