Bugun.tv xəbər verir ki, mütəxəssislər zülalın insan orqanizmi üçün vacib qida elementi olduğunu bildirsələr də, onun normadan artıq qəbulunun bəzi sağlamlıq problemlərinə səbəb ola biləcəyi barədə xəbərdarlıq ediblər.
Mütəxəssislərin sözlərinə görə, son illərdə yüksək proteinli pəhrizlər və zülal əlavələri geniş yayılıb. Lakin həddindən artıq protein qəbulu böyrəklərin fəaliyyətinə əlavə yük yarada, orqanizmdə susuzlaşma riskini artıra və həzm sistemində narahatlıqlara səbəb ola bilər.
Araşdırmalara əsasən, uzun müddət normadan artıq zülal qəbul edən şəxslərdə qəbizlik, bağırsaq mikroflorasının pozulması və bəzi hallarda ürək-damar sistemi ilə bağlı problemlərin yaranma ehtimalı yüksələ bilər.
Həkimlər bildirirlər ki, gündəlik protein ehtiyacı insanın yaşı, çəkisi, fiziki aktivliyi və sağlamlıq vəziyyətindən asılı olaraq dəyişir. Bu səbəbdən qida rasionunda zülalın miqdarı fərdi xüsusiyyətlər nəzərə alınaraq müəyyənləşdirilməlidir.
Mütəxəssislər balanslı qidalanmanın vacibliyini vurğulayaraq, zülal mənbələri ilə yanaşı meyvə, tərəvəz, tam taxıllı məhsullar və faydalı yağların da rasionda yer almasını tövsiyə edirlər.
Mənbə: Mail.ru Zdorovye